In t Goy Pachtbrieff van Willem Paeu va[n] XXX merge[n] la[n]ts a[nn]o XIIIJc XCIX
ick Willem Eerntsz doe condt en[de] kenlick allen luijden en[de] bekenne mit desen
tegenwordigen becene dat ick voir mij mijne erve[n] en[de] naecomelinge in pacht
en[de] huijrweer genome[n] heb en[de] neme van den eerwerdige[n] here[n] Steven van
Zuijlen van Nijevelt lantcom[m]endeur der balijou van Utrecht ich[?] en[de] sijne[n] nae
comelinge daertich mergen lants gelegen inden gherechte van den goije alsoo
groot en[de] cleijn als die gelegen sijn en ick van den voirsz[egde] lantcom[m]endeur ende
oirden gebruijct heb Thien jair lanck om een duiren[de] Ingaende op sinte Peters
dach ad cathedera[m] naistcomende des jairs om dartich mudde weijts groot coopma[n]s
goet op een groetgen naest den besten die intrecht op die merct veijll komet
en[de] the leveren in hove[n] con[n]ente[?] op hoere folge bijnne[n] Utrecht ende dair toe
twijntich goede pacht hoendre the betalen die een helfte op vanden koorn en[de]
alle die honre op Sinte Mertijnsdach in de wijnter ende die ander helfte op
Sinte Petersdach ad cathedra[m] dair naist bolven[de] off bijnne[n] veerthien daghen
nae elcker termijn onbegreepe[n] ende soo voirt van jair tot jair dese voirsz[egd] tien
jaren lanck durende voirt sall ick dat voirgh[enoemde] lant bruijcken en bewairen als
een goet huijrman en[de] pachter bane[n] en[de] beneden sculdich is the doen mijt alsulc
ker voirwairden oick toe gedaen offt saicke wair dat ick dese voirsz[egde] jairlijcxe
pacht alle jair nijet en beailen op ten voirgh[enoemde] termeijne[n] soe sall ick van der huere
en[de] pachtinghe des lants vervallen sijn en[de] gheen segge dair toe heb[ben] alsoo
verre mijne[n] heer die lantcomendeur inder tijt dat alsoo belieffden en[de] mijn geen
huir holden en eolde all dinck sonder argelist in oirkonde der wairheit wat
ick Willem voirsz[egd] nu ter tijt selven gheen segell en hebbe soo heb ick geboden
den eerbaren Evert Zonderbalth dijckgreve opten kerkendijck dijt over mij te
besegellen dat ick Evert ther beden van Willem voirgh[enoemd] gheerne gedaen heb
en[de] hebbe mijn segell om deesen brieff gehangen in t jair ons heeren duijsent
vierhondert Negenentnegentich op ten vier en twintichth dach in maerte | 