229

    opten XVIJ^en julij 1589

Upten eijsch bij Joris Amelsz opten IIIJ^en julij gedaen contra
Maerten Fecke zeijt Maerten Fecke veur defentcije dat Joris
Amelsz nemmeermeer bewijsen en sal den rechten genoch
zijnde dat het erff in questije met een vrije overeed
beswaert is . ende off 't selffve al beswaert waer als neen soe is
den selffven Joris Amelsz ende allen d'anderen bijden in tijde
van de veijlinge van den veijlder . daer van genoch geadverteert
als des noot zijnde breeder blijcken sal. Concluijdeert tot nijet
ontfanckelijc ende bij ordre tot apsoluijtcije van den instantcije
com expensis.

Amel Gerijtsz alijdgeert in juijdijtcije dat Maerten Fecke nijet
waerdich is met Scheepenen aen den schijff te staen.

Den Offijtcier voecht hem perthije ende versoeckt dat het aenseg
zal worden geprobeert nae rechte.

Scheepenen verclaeren bij hueren vonnisse dat Joris Amelsz
den oblegatcije +^{+ contra Maerte Fecke} met vijff gulden XVIJS st[uiveren] berekende penning sal in
affcortinge brengen tegens den kustinge dien Maerten van Joris Amelsz
resteert.

Amel Gerijtsz alidgeert in juijdijtcije van scheepenen zeggende
dat hij een rijp + ^haertich woort gesproken zoude hebben waer
van hij berouh heeft ende laet hem 't selffijge ontfallen nae rechte ende
costuijme van den lande midts betalend in handen van den offijtcier ende
Maerten Fecke 't gunt daer toe staet.

Daer op seijt den schoudt geen ontfal te zijn uuijt sake
dat 't selffde in juijdijtcije van scheepenen in den vierscaere geschiet is.

Jan Jansz Coster als procareur van Joris Amelsz repliceert ende seijt
dat Maerten Pietersz Fecke gehouden sal wesen het huijs ende erffve
in questije te vrijen van de servituijt nae inhoudt zijn acte daer hj 't
nae vercocht heeft ende midtsgaders zijn vrije quijtantcije concluijdeert
daeromme als aput acta.

Duijpliceerend persisteert Maerten Pietersz bij zijn defentcije in voegen
als boven.