Alle den ghenen die desen brief sellen sien off horen lesen doe ick verstaen Willem Taets van Amerongen schout int Goeij ende tot Houten in mijns lieffs heer[en]
gherechte van Utrecht dat voer mij ende voir die lantgenoten ende buere die hier naeescreven staen quamen int gherechte voirsc[reven] Luijtgen Woutersz,
Wouter, Fije ende Peter zijn kijnder die hij hadde bij Beatrijs Ghijsbert Harmensz dochter sijnen voir wijve Phillips, Goeijert ende Cornelis oick des
voirsz[egde] Luijtgens Kijnder die hij hadde bij Celije Govert Gerijtsz dochter sijnen naewijve ende begheeerden eens oirdeels off die vier morghen ende
twe hont lants alsoe die gelegen sijn inden gherechte voirsz[egd] op streckende van den Houtenschen wech aen die biscops hoeff toe dair Arent Taets
ende Anthonis Jacob die Brouwersz boven ende Johan van Oestrum Willemsz ende Ghijsbert die Craens erffnamen mitte[n] melaten buijtern Utrecht
beneden naestgelant zijn alsoe vrije ende alsoe losse hem wair dat sij die mochten vercopen versetten versellen ende den vrijen eijgendom daer van
overgeven vrijlijcken wijen dat sij wouden ende hem werdt ghewust int recht ende mit oirdele dat sijt wel doen mochten ende dattet mitten
rechte stedicheit hebben ende houden sol ende aldair soe gaff Luijtgen voirsz[chreven] mit sijns selffe hant voir hem selven Wout[er]. Fije. Peter, Phillips, Goeijert
ende Cornelis zijn kijnde[re]n voirsz[egd] geven elcx mit handen hoir maghe van horen vierendelen die dair tegenwoerdich ende voir oghen waren ende zij
gaven alle mit gesamender hant alse recht wijsde over heer[en] Gheerloff van der Donck canonick then doem t Utrecht den vrijen eijgendom van den vier
morghen ende twe hont lants voirsz[egd] alsoe die hier voir bescreven ende bepaelt staen ende sij verteghen dair off ende van alle rechts ende toeseggens
dat sij dair aen hadden ende mede van allen brieven die dair off roerende zijn tot heer[en] Gheerloffs behoeff voirg[enoemd] alse die lantgenoten ende buere
voirsz[egd] wijsden dat recht was ende sij mit rechte sculdich waren the doen ende dat die ghijste ende vertichte mitten rechte stedicheit hebben ende houde[n]
sell ende zij geloefden hem mede uit handen voirsz[egd] jair ende dach the vrijen ende the waren alse erffcoop recht is naden recht van den landen ende
alle voercommer off the doen sonder arghelist hier waren over ende aen dair dit geschiede Phillips Hilbrantsz van Rossum, Jan Hilbrantsz van Rossum
ende Dirck Beerntsz van Scadijck lantgenoten ende bue[re] inden gherechte voirsz[egd] ende anders veel goeder luijde in kennisse der wairheit soe hebbe ick Willem
Taets van Ameronghen schout voirsz[egd] mijne[n] segel aen desen brief ghedaen van des gherechts weghen over mij selven ende mede over die lantgenote[n] ende
bue[re] voirsz[egd] om hore beden wille datwij lantgenoten ende bue[re] voirsz[egd] oirkonden ende gughen onder des schoute[n] segel voirsz[egd] ende hebben hem ghebeden desen
brieff mede over ons the besegelen mit sijnen segel want wij hier mede over ende aen waren dair dit geschiede gelijck hier voir bescreven staet gegeve[n]
int jair ons heere[n] duijsent vierhondert vijffendetachtich op ten achsten dach in meerte