Alle den ghenen die desen brief sellen sien of horen lesen doe ick verstaen Willem Taets van Amerongen schout
int Goij ende tot Houten in mijns liefschen gherecht van Utrecht dat voor mij ende voer die lantgenoten en[de]
bue[re] die hier nae bescreven staen quamen int gerecht voirsch[reven] Gerijt Dircx, Willem Jansz, Lijsbeth
sijn wijff Harmen Henricxz, Jan Govertsz, Jan Jansz ende Aernt Jansz ende begheerden eens
oirdeels off die rechte helfte van twe m[er]gen lants gelegen int Goij optie Gheer inden gerecht
voirsch[reven] dair Matheeus Koevoet ende Anthonijs Jacop de Brouwersz boven en[de] die melaten
buijten Utrecht en[de] Gijsbert de Cranen erffnamen beneden naestgelant sijn streckende van de
biscops hoeff inde geersloet toe alsoe vrij en[de] alsoe losse hem wair dat hij die mochte[n] vercope[n]
versetten versellen ende den vrijen eijgendom daer van overgeven vrijlijken wijen dat sij
wouden ende hem wort gewijst mit recht ende mit oirdele dat sijt well doen mochte[n] ende
datet mitte rechte stedicheit hebben sell ende aldair soe gave[n] alse Gerijt voirsch[reven] voer hem
en[de] voer Geertruijt sijne[n] wijve Harme[n] Henricxsz voir hem en[de] voir Machtelt sijnen wijve Jan
Govertsz voir hem en[de] voir Janna sijne[n] wijve dair sij elcx op dese tijt wittelijke geboerte bij
hebben Jan Jansz en[de] Arnt Jansz gaven elcx mit hoers selffs hant voir hem selven Willem
Jansz en[de] Lijsbeth sijn wijff voirsch[reven] gaveb nut gesamender hant en[de] gave[n] alle mit ghe
samender hant alse recht wijsde over Luijtgen Woutersz den vrijen eijgendom van die
rechte helfte vande[n] twe m[er]gen lants voirsch[reven] soe die hier voer bescreven en[de] bepaelt staen en[de]
vertegen daer off mit handen voirge[noemd] ende van alle rechts en[de] toeseggens dat sij dair aen
hadden ende mede van allen brieven die dair off rie[re]nde sijn tot Luijtgen Woutersz behoeff
voirg[enoemd] alsoe die lantgenote[n] en[de] bue[re] voirsch[reven] wijsden dat recht was en[de] sijt met rechte
sculdich ware[n] the doen en[de] dat die ghijste en[de] vertichte mitten rechte stedicheit hebben en[de]
houden sell ende in geloefden hem mede mit handen voirg[enoemd] jair en[de] dach the vrijen en[de]
the ware[n] alst erffcoop recht is werden recht vanden lande en[de] alle voercom[m]er off the doen
sonder argelist hier waren over en[de] aen dair dit geschiede Willem van Schadijck van Oistrum
Jansz, Gerijt Aerntsz ende Dirck Aerntsz lantgenoten en[de] bue[re] inden gerechte voirsch[reven] ende
anders veell goeder luijde in kennisse der wairheit soe hebbe ick Willem Taets van Am[er]ong[en]
schout voirsch[reven] mijne[n] segell aen desen brieff gedaen van des gerechts wegen en[de] mij selven
en[de] mede over die lantgenote[n] en[de] bue[ren] voirsch[reven] om hore beden wille dat wij lantgenoten
en[de] bue[re] voirsch[reven] oirkonden en[de] tugen onder des schouten segell voirsch[reven] en[de] hebben hem gebede[n]
desen brieff mede on[der] ons the bezegelen mit sijne segell want wij hier mede over en[de]
aen waren dair dit geschiede gelijck hier voir bescreve[n] staet gegeve[n] int jair ons he[re]n
duijsent vierhondert en[de] tachtich op sinte Katherijnen avondt