Alle den ghenen die desen brief sellen sien of horen lesen doe ick verstaen Willem Taets van Amerongen schout int Goy ende houte[n]
in mijns lieffs hee[re]n gerecht van Utrecht dat voer mij ende voer die lantgenoten ende bue[re] die hier nae bescreve staen qua[men]
int gerecht voirsch[reven] Gerijt Dircx van Schadijck ende begheerde eens oirdeels off die rechte helfte van twee
mergen lants mit alle hore[n] toebehoe[re]n alsoe die gelegen sijn optie gheer inden gerecht voirschr[even] streckende van
sbiscops horne indie gheersloet dair Matheeus Koevoet ende Anthonis Jacop de Brouwersz boven en[de] die malate[n]
buijten Utrecht en[de] Gijsbert de Cranen erffnamen beneden naestgelant sijn alsoe vrij ende alsoe losse hem wair
dat hij die mochte vercoopen versetten versellen ende den vrijen eijgendom dair van overgheven vrijlijken
wijen dat hij woude ende hem werdt gewijst mit recht ende mit oirdeell dat hij t wel doen mochte ende
dattet mitte[n] rechte stedicheit hebben ende houden sell ende aldair soe gaff Gerijt Dircxz van Schadijck voirsz[egd]
voir hem en[de] voir Geertruijt sijnen wijne[n] dair hij op dese tijt wettelijke geboerte bij heeft over Luijtgen Woutersz
den vrijen eijgendom van die helfte van den twe mergen lants mit alle horen toebehoe[re]n soe die hier voir bescreve[n]
ende bepaelt staen ende verteech dair off ende van alle rechts ende toeseggens dat hij dair aen hadde en[de]
mede van allen brieven die dair off rue[re]nde sijn tot Luijtgen Woutersz soens behoeff voirg[enoemd] also die lantgenot[en]
en[de] bue[re] voirsch[reven] wijsden dat recht was ende hij mit rechte sculdich was the doen ende dat die ghijste en[de]
vertichte mitten rechte stedicheit hebben ende houden sell ende hij geloifdet hem mede jair ende dach the
vrijen ende the waren alse erffcoop recht is naden recht van den lande ende alle voerco[m]mer off the doen sond[er]
argelist hier waren over en[de] aen dair dit geschiede Hilbrant van Rossum, Andries van Rossum, Gherijt van
Schadijck Gijsbertsz en[de] Willem van Oistrum Jansz lantgenoten ende bue[re] inden gerecht voirsch[reven] ende anders
veell goeder luijde in kennisse der wairheit hier off soe hebbe ick Willem Taets van Am[er]ongen schout voirsch[reven]
mijnen segell aen desen brieff gedaen vandes gherechts wegen over mijn selven en[de] mede over die lantgenote[n] ende
bue[re] voirsch[reven] om hore beden wille dat wij lantgenote[n] ende bue[re] voirsch[reven] oirkonden en[de] tugen onder des schoute[n] seggell
voirsch[reven] en[de] hebben hem ghebeden desen brieff mede mede over ons the bezegelen mit sijne[n] segel want van hier mede
over ende aen ware[n] dair dit geschiede geliick hier voir bescreve staet gegeve[n] int jair ons he[re]n duijsent vier
hondert een ende tachtich op sinte Geertruijden avondt