Allen den ghenen die desen brieff sullen sijen off horen lesen doe ick verstaen Joest Gherijts schout inden gherecht van Schalckwijck van weghen des edelen heren Johans van
Lutcenborch here van der oudt van Vijlen van Culenborch van den Weerdt van Hoegstraten van Borssel __ dat voer mij en voer die lantgenoten en buerlude die hier nae bescreven staen
gecomen sijn inde gherecht voirsz[egde] dese nae bescreven parsonen als Frederick Hack en mit hem Reijm, Dirck Jansz dochter sijn gheechte huijsvrou Steven Jansz die Wit alse gheechte
mo[m]baer van Reijm sijn huijsvrou also hij daer wittelike gheboirt bij heeft die oude Johan Gherijt Hermansz voer hem en voer Hillegont sijn huijsvrouw daer hij wittelike geboirt bij heeft
Herman Gherijtsz voer hem en voer Elizebeth sijn gheechte huijsvrou daer hij wittelike gheboirt bij heeft Egbert Gherijtsz voer hem en Werffij[?] sijn huijsvrou daer hij wittelike gheboirt bij heeft die
jongh Jan Gerrijtsz voer hem en voer Marij sijn gheechte huijsvrou daer hij wittelike gheboirt bij heeft Reijer Gherijtsz mit hem Elizabeth sijn gheechte huijsvrou Alparaet van Vijelensteijn
Gherijt Hermansz wedue mit haren ghecore mo[m]baer en voecht als ghemachticht mit scrijfte van Jan Gherijtsz haren soen Willam die Keijser als gheechte mo[m]baer van Reijm Gherijt Hermansz dochter
daer hij wittelike gheboirt bij heeft Gherijt Dirckxsz als gheechte mo[m]baer van Elizabeth Gherijt Hermansz dochter sijn gheechte huijsvrou daer hij wittelike gheboirt bij heeft Alijt Gerijt
Hermansz dochter Eerst Goijersz weduw mit haren ghedoren mo[m]baer Claes Gherijtsz voer hem en voer Frijsten sijn huijsvrou daer hij wittelike gheboirt bij heeft en begheerden aldaer een oerdelen
off dijen eijgendom van eenre halffver hoeffven landts also groet en cleijn als die van outs gelege en gelant leijt inden voirsz[egde] gherecht op t Waellvelt streckende uter weteringe tott opslach
thoe van Waelre Weteringhe daer boven dat gasthuijs van Sinte Bartholomeus bijnnen Utrecht en beneden Hubert Roeloffsz mit erfpacht naest ghelant sijn also vrijen losse
hemluden ghesamentlijck waer dat sij die mochten vercopen versette versellen en enen vrijen eijgendom daer off overgeve mochten wijen dat sij wouden en hem wardt thoegewijst
mit recht en mit oerdell dat sij dat well doen mochten mit recht en dattet stedicheijt hebben soude dee rechtenoirt aldaer so gaue alle dese voirgen[oemde] parsone over ghesamende
hant alse recht en oerdell wijsden dat recht was Johan then Bosch rentmeijster des genaents van Bethelehem buten Utrecht enen vrijen eijgendom tot behoeff des voirsz[egde]
convents van dese voirs[zegde] halffver hoeffven landts also die hier voer bescreven en bepaelt staet en hem luden aenbestorven was van dode Heijnrickge Herman Egbertsz dochter
Willam Gherijtsz wedue saliger ghedachten en verteghen oeck mede daer off claerlijck mit recht en mit oerdell van allen rechts en thoeseggen als sij daer an hadden
en van allen ouden brieffven daer aff ruerende tot behoeff des genuents voirs[zegd] als die lantgenoten en buerlude wijsden dat recht was en dat dese ghijsst en verticht
mit recht stedicheijt hebben en houden sell en gheloeffden oeck mede desen voirsz[egde] eijgendm the vrijen en the waren jaer en dach en alle voerconmer off the doen als erffcoep
recht is naden recht van den lande aldunck sonder argelist hier waer over en aen daer dit dit aldus ghescijede als lantgenote en buerliede inde gherecht voirsz[egd] Anthonis
Eerstensz, Willam Akcrijnsz, Johannes Jansz en meer goeder luden in kennisse hier off so heb ick Joest Gherijtsz scout voirsz[egd] over mij selffve en oeck mede over die lantgenoten
en bureliede voirge[noemd] om hoerre beden will desen brieff besegelt mit mijnen segell tot ene oerkonde van dob[?] gherechts weghen voirsz[egd] en wij lantgenoten en buerlude voirgen[oemd]
oerkoncen en teghen dese voirsz[egde] punten onder ons scouten segell voirsz[egd] en hebben hem oeck ghebede desen brieff mede over ons the besegelen mit sine segell want wij hier mede
over en aen ghewest hebben daer dit aldus ghescijet is als voirsz[egd] staet gegheve int jaer ons here dusent vijffhondert en sess opte sessentwijntichste dach in octobri ___