Alle den ghenen die desen brief sellen sien of horen lesen doe ick verstaen Ghijsbert van der Hair schout tot Bu[n]nick ende tot vechten in mijns liefs heere[n] gerecht
van Utrecht dat voir mij ende voir die lantgenoten ende buere die hier nabescreven staen quam int gerecht voirscreve[n] Luijtgen Woutersz en[de] begheerde
eens oirdeels off die halve hoeve lants alsoe die gelegen is op Rijsbrug in den gerechte voirschr[even] aen drien pcelen dair dat een stuck van twe morgen off
gelegen is onder Evert Aerntssoensz hoffstede ende is streckende uiten reetsloot aende rijsbrugschewech dair Gerijt Janssoens erffnamen boven en[de]
Zweer van Vijaene[n] vna Rijsenborchs erffname[n] beeneden naestgelant zijn dat ander stucke van twe morgen ende sijn vier ackers is strekcnde van de
Rijsbrugschenwech op tot aendes voors[zegde] Zweer van Vijane[n] van Rijsenborchs ende Claes van Valkendaels lant dair die selve Claes van Valkendael
boven ende Zweers erffname[n] voirsz[egd] beneden naestgelant zijn item dat derde stuck houdende vier morgen is oick streckende van den Rijsbrugschen
wech tot aen die kae daer t convent van regulieren bijnnen Utrecht boven ende Claes van Valkendael voirsz[egd] beneden naestgelant zijn also vrij ende
also losse hem wair dat hij die mochte vercopen versetten versellen ende den vrijen eijgendom dair van ov[er]genomen vrijlijken wien dat hij woude ende
hem werdt gewijst mit rechte ende mit oirdele dat hijt well doen mochte behoudeliken onse genadige hee[re] van Utrecht zijns rechts ende aldair soe gaff
Luijtgen Woutersz voirsz[egd] over Wilger Jacobssoen tot behoeff dat convent van den heiligen elffduijsent meechden gelegen bijnnen Utrecht
den vrijen eijgendom van der halver hoeven lants alsoe alse die hier voir bescreve[n] ende bepaelt staen ende hij vertech dair off ende van
alle rechte ende toeseggens dat hij dair aen hadde ende mede van allen brieven die dair off roerende zijn tot des convents behoeff voirgenoemt
alse die lantgenoten ende buere voirsch[reven] wijsden dat recht was ende hij mit rechte schuldich was the doen ende dat die ghijfte en[de] vertichte
mitte[n] rechte stedicheit hebben ende houden sell ende hij geloefdet den convente voirsch[reven] mede jair ende dach the vrijen ende the waren alse
erffcoop recht is naden recht van den landen ende alle voircommer off the doen sonder argelist hier waren over ende aen dair dit geschiede Henric
van Ghendt, Johan van Herdenbroeck, Daem van Scadijck Willemsz ende Evert Aertnsz lantgenoten ende bue[re] inden gherechte voerschreve[n] ende
anders veell goeder luijde in kennsse der wairheit soe hebbe ick Ghijsbert vander Hair loeffssoen schout voirsch[reven] mijnen segell aen desen brieff
gedaen van des gherechts wegen over mij selven ende mede over die lantgenoten ende buere voirsch[reven] om hore beden willen dat wij lantgenoten
ende bue[re] voirsch[reven] oirkonde[n] ende tugen onder des scoute[n] segell voirsch[reven] ende hebben hem gebeden desen brieff over ons the besegelen mit
sijne[n] segel want wij hier mede over en[de] aen waren dair dit geschiede gelijck hier voir bescreven staet gegeven int jair ons heere[n] duijsent
vierhondert vierendetachtih opten anderden dach in junio