Alle den ghenen die desen brief zellen zien of horen lesen doe ic verstaen Jacob Deuer scout tot Bunnic dat voir mij voir die lantghenoten
ende buere die hier na bescreven staen quam intgherecht e Wouter Luijtgens zoen ende begheerde eens ondels af die zes morghen lants also
alse die gheleghen zijn inden gherechte voirscreven aen tween stucken daer de vier morhgen af strecken van Riisbrug ande ka daer Bertout Jans
zoens erfnamen boven naest ghelant ziin ende beneden Jan Witvoet ende die ander twe morghen ziin gheleghen bi Hernics Bloserts opstreckende
metten enen eijnde ande outslote vaert ter kae wert aen daer die schijne voven ende beneden naest ghelant is also vrij ende also los siin waren
dat hi die machte vercopen versetten versellen ende enen vrijen eijghendom af gheven dien hi woude en[de] hem wert ghewust mit rechte en[de]
mit oirdele dat hut wel doen mochte ende dat die ghifte mit rechte stedicheijt hebben zoude ende aldaer so gaf Wouter Luijtgenszoen
voirseijt rechtevont over jonghe Willam Sluter ende Gouwe Henric Lucks dochter tot behoef Peters Henric, Jan Elborch Gouborch en[de]
Aliit Peter Lucks kinderen die hi hadde bi Margrieten zinen wiive Willam Sluters dochters den vrijen eijghendom van den zes morgen lants
voirseijt also als die hijer voir bescreven ende bepaelt staen ende verteech daer of ende van allen rechtes en[de] toesegghens dat hi daer aen
hadde tot behoef der kinderen voir ghenoemt alse rechte ende ondele wusde dat hi sculdich was te doen ende dat die ghifte ende vertichte
voirseijt mit rechte stedicheijt hebben ende houden sal sonder arghelist daer die gheschiede waren over en[de] ane Herman van Oemeren
Willem Peterszoon ende Dirc Janszoen lantghenoten ende buere inden gherechte voirscreven ende anders veel goeien lude in oirckonde deser
anighe voirghenoemt so hebben we Jacob Deuer schout Herman van Oemeren ende Willem Pieterszoen voirseijt desen brief beseghelt mit onsen
zeghellen van des gherechts weghen over ons selven ende ic Willem Peterszzoen voirseijt mede over Dirc Jans zoen voir ghenoemt om
suure beden wille ende want ic Dirc voirseijt selve ghenen zeghel en hebben op dese tijt so orkonde en[de] tughe ic dit onder Willam Peterszoens
zeghel voir ghenoemt en[de] hebbe hem ghebeden desen brief mede over mij te besegellen mit ziinen zegel want ic daer mede over en[de] aen gheweest
hebbe daer dit gheschiede gheliic hier voir bescreven staet ghegheven int jaer ons heren dusent vierhondert zesse en[de] dertich des zon
nedaghes na sinte achten dach